一日之計在於茶

有太陽之下嘅地方就有華人，但係港式早餐就並非絕對，茶餐廳始終係一種生意，唔可以綑綁響情意結上，而係必須要見到市場需要。

老華僑住響加拿大卡加利就嚟三十年，略見港式茶餐廳響本地市場嘅進化。八九十年代嘅移民潮，卡加利嘅港式餐館好似千帆並舉，尤其係華埠(唐人街)好不熱鬧，朝早七點排隊嘅餐館有，凌晨想飲杯港式奶茶又得。

時移勢易，市場需求轉變，加上疫情，港式茶餐廳數目寥寥可數，最早嘅開九點，而且晚上亦較早打烊，有陣時想嘆杯香港情懷港式奶茶，或者嚴寒季節想食碗熱辣辣嘅火腿通粉，都談何容易。

不過，近期香港移民卡加利數目飆升，喜見再有茶餐廳推出港式早餐，雖然要上午 late morning 先開賣，但風味十足，而且響茶餐廳見到唔少操流利廣東話嘅「生面口」，相信係香港新移民，茶餐廳嘅氣氛都熱鬧咗。

你又搵唔搵到自己喜愛嘅茶餐廳呢？